Blog Gwenno - Mis Chwefror

Helo! Gwenno ydw i ac rwyf yn dod o Benrhyn-Coch ger Aberystwyth, Ceredigion. Eleni, byddaf yn gweithio fel athrawes Gymraeg yn Ysgol y Cwm, Trevelin. Dilynwch fi ar fy nhaith i ben draw’r byd ac i glywed fwy am fy hynt a helynt.

Bu’n freuddwyd i mi ers blynyddoedd bellach i weithio yn y Wladfa. Wedi gorffen fy mlwyddyn sefydlu mewn ysgol yn Aberystwyth, es ati i chwilio am swydd dramor a gwelais fod Ysgol y Cwm yn chwilio am athro. Profiad newydd i mi oedd cael cyfweliad Skype ond ar nos Sadwrn nôl ym mis Medi cysylltodd Clare Vaughan o Drevelin a fi i’m cyfweld. Bu’n sioc enfawr clywed gan Clare trannoeth yn cynnig y swydd i mi!

Anodd iawn oedd ffarwelio ar deulu a ffrindiau. Anodd hefyd oedd pacio’r siwtcesys gan sicrhau eu bod dan bwysau. Cofiwch roedd rhaid pacio am ddeg mis! Gyda’n bagiau wedi’i bacio, dyma fi’n mynd am y maes awyr ar y 9fed o Chwefror a hynny yng nghanol Storm Caira! Y cyngor i bawb y diwrnod yna oedd peidio gadael y tŷ heblaw bod wir angen a dyna le roeddwn i, Mam a Dad yn mynd o Geredigion i Gatwick. Wedi teithio am ryw awr, dyma neges yn dweud fod yr hediad wedi’i ddileu. Golyga hyn y buaswn yn cyrraedd Buenos Aires yn rhy hwyr i ddal yr ail hediad ac y bws o Bariloche i Esquel. Fodd bynnag, braf iawn oedd gwybod fod Margarita Green a Clare ochr arall y ffon yn paratoi cynllun B, C a Ch i mi. Roedd yr hediad bum awr yn hwyr yn gadael Gatwick ac am ddau o’r gloch y bore dyma adael am Buenos Aires. Trwy lwc i mi lwyddais i gysgu mwyafrif yr hediad! Hoffwn ddiolch i Deithiau Tango am noddi’r hediad allan i Buenos Aries- diolch yn fawr iawn. Un taith awyren a un daith bws yn ddiweddarach braf iawn oedd gweld Clare yn aros amdanaf yn Esquel!

Tridie ar ôl gadael Penrhyn Coch, dyma fi’n cyrraedd Trevelin a gweld arwyddion Cymraeg a’r ddraig goch yn chwifio’n uchel dros y dref. Dwi’n byw mewn fflat newydd yng nghanol y dref- yn agos i bopeth ac wrth agor y lleni yn y bore, caf fy nghroesawu gan fynyddoedd yr Andes- hyfryd yn wir.

Roeddwn yn nerfus iawn i gwrdd â phawb ond roedd dim angen poeni o gwbl. Mae pawb wedi bod yn hynod o groesawgar ac wedi gwneud i mi deimlo’n rhan o’r gymuned yn syth. Dwi’n dechrau cyfarwyddo gydag arferion Ariantwyr- siestas (roedd hwn ddim yn anodd iawn…) y bwyta’n hwyr gyda’r nos a’r ffaith fod popeth yn llawer mwy hamddenol- mae 20:00 yn golygu tua 21:00 ar y cynharaf. 

Cyn cyrraedd roeddwn yn poeni braidd am fy niffyg Sbaeneg. Mae wedi bod yn heriol mynd i siopa a gofyn am bethau, ond, gyda symudiadau gwahanol ac ychydig o Sbaeneg dwi’n dod i ben. Fodd bynnag, erbyn mis Rhagfyr mi fyddaf yn rhugl…gobeithio. Yn yr ysgol, mae Nia Jones (athrawes Gymraeg) a Margo (gwirfoddolwr) yn fy helpu gyda’r iaith a dwi’n dechrau dod i ddeall fwy.

Ar ddiwrnod cynta’r ysgol, cafwyd seremoni Acto i groesawu’r flwyddyn newydd. Wedi’r seremoni ddigwydd, cafodd pob aelod o staff ei gyflwyno…trwy neidio allan o focs enfawr! Dwi’n dysgu blynyddoedd dau a phedwar yn yr ysgol yn ogystal â dysgu athrawon ac oedolion eraill. Dwi erioed wedi dysgu oedolion felly’n edrych ymlaen at y sialens newydd yma. Erbyn hyn rwyf wedi cyrraedd diwedd fy wythnos gyntaf o ddysgu yma yn Nhrevelin. Mae’r plant yn hynod o groesawgar ac yn barod i weithio ar ôl gwyliau’r Haf.
Diolch yn fawr iawn i chi Ysgol y Cwm am y cyfle arbennig yma, dwi’n edrych ymlaen at fwrw fewn i’r gwaith arbennig sydd yn aros amdanaf eleni! Mae nifer o bethau cyffroes yn digwydd fis nesaf gan gynnwys dathliadau Dydd Gŵyl Dewi.

Felly, hwyl am y tro,
​
Gwenno 

---