Adnodd Newydd Ar Gyfer Dysgwyr Y Wladfa

Mae gwefan sydd yn helpu pobl i ddysgu Cymraeg bellach ar gael mewn Sbaeneg. Fe lansiwyd Parallel.Cymru ym mis Tachwedd 2017 gan Neil Rowlands, dysgwr o Gaerdydd ac Abertawe gyda chefndir mewn Technoleg Gwybodaeth, dylunio graffig a gwe, a rheoli elusennau bach. Cafodd y syniad o greu’r wefan wrth wirfoddoli gyda’i Fenter Iaith leol.
“Yn lle bod yn blog cyffredin, dw i'n canolbwyntio ar roi persbectif person cyntaf ar y byd Cymraeg,” eglurai Neil.
“Felly, pobl sy'n ysgrifennu, rhedeg busnesau, trefnu gweithgareddau, creu cerddoriaeth a chelf, neu sydd â stori ddiddorol i’w hadrodd, sy’n rhannu eu profiadau.”
“Mae hyn yn golygu y bydd cynnwys unigryw a safonol i chi ei fwynhau bob tro y byddwch yn dod i’r wefan”
Y syniad y tu ôl i Parallel.Cymru oedd creu cylchgrawn dwyieithog ar-lein, gyda chasgliad o erthyglau, bywgraffiadau, straeon a mwy i’w mwynhau drwy gyfrwng y Gymraeg a’r Saesneg. Drwy gyhoeddi popeth ochr-wrth-ochr yn y ddwy iaith, mae’r wefan yn rhoi cyfle i ddysgwyr ehangu eu geirfa trwy ddarllen yn Gymraeg gyda chymorth y cyfieithiad Saesneg. 
Ym mis Chwefror 2018  fe gyhoeddodd y wefan ei erthygl gyntaf drwy gyfrwng y Sbaeneg, ochr-wrth-ochr gyda chyfieithiad Cymraeg, er mwyn helpu dysgwyr Cymraeg Patagonia. Mae erthyglau newydd yn cael eu hychwanegu bob wythnos, ac mae’r wefan bellach yn dal dros 5,000 o eitemau amrywiol, gan gynnwys cylchlythyrau Ysgol y Cwm a gwaith o gystadlaethau cyfieithu eisteddfodau’r Wladfa.
Un sydd yn gyfarwydd â Parallel.Cymru yw Dr. Lynda Pritchard Newcome, awdur y llyfr ‘Speak Welsh Outside Class’ (Siaradwch Gymraeg Y Tu Allan i’r Dosbarth’), a ymwelodd â’r Wladfa’n ddiweddar. Dywedodd Lynda:
“Rwy’n credu, fel llawer o diwtoriaid ar hyn o bryd, bod hunanhyder yn fwy hanfodol wrth ddysgu iaith na thalent. Wrth ddarllen testunau paralel mae dysgwyr yn gallu datblygu sgiliau heb deimlo dan fygythiad, yn adeiladu hyder i ddefnyddio beth maen nhw wedi dysgu yn y byd go iawn."
Mae Parallel.Cymru wedi ei anelu at ddysgwyr a siaradwyr o bob lefel, ac mae’r erthyglau wedi eu trefnu yn ôl safon yr iaith, o straeon byr hawdd i’w darllen i erthyglau llenyddol . Mae’r wefan yn gwbl rad ac am ddim, ac mae deunydd hefyd ar gael i’w lawr-lwytho ar ffurf PDF neu MP3.

---